Fantastic Four (2005)

片名一定要翻譯做《神奇4俠》，如果寫《神奇四俠》，就不夠型了，因為夾唔到個4字的Logo 。咁點解英文又唔叫做[Fantastic 4]呢？唔知，我淨係知道[Spider-man]中間必定要加一橫，因為原作者唔想閱讀障礙鬼仔望到以為係[Superman]。

淡而無味。

或者女觀眾會覺得，這跟《蜘蛛俠》、《蝙蝠俠》、《X-men》其實都沒分別，一樣人物平面劇情簡單。

但其實有分別的：《蜘蛛俠1&2》我都喜歡，卡通一樣的劇情白痴但節奏流暢，雖然常有穿崩但蛛蛛俠飛來飛去實在好看，而且主角討好（我是支持蛛女Kirsten Dunst的）；《X-men 1&2》的選角也好，異能人特技精彩，角色的描寫也。

如果帶私心的分析沒意思，也不妨留意荷里活電影工業的發展：如果沒有以上兩個系列功，計數佬絕對唔會肯投資曾經蝕水的《蝙蝠俠》系列、《Hell Boy》這類偏門而且化妝特技成本高的漫畫也難獲搬上銀幕、當然還有《神奇4俠》亦未必會面世。

這片的次貨感覺很強，演員唔識唔緊要，但冇演技對白角色也平面。以隱形女俠為例，她一旦不穿貼身衫或露乳溝，我差唔多認唔出佢，比隱形特技，更強。領隊橡筋人是個亞叔，他的橡膠特技也不特別出色，也許是異能本身先天不足，本身就不是吸引的英雄元素。

比較有趣的是invisible girl的噴火細佬，愛出風頭的角色，在人群中洋洋得意的身體語言和眉目神態，竟然有少少似tom cruise，唔係話佢靚仔到似湯，而是那"自覺有型"的神態，出來倒有歡樂今宵的戲謔效果。

Cinema: 淘大百老匯（戲院喇叭啪啪聲！）
Director: Tim Story
Cast : Ioan Gruffudd（橡筋人）．Jessica Alba（隱形女）．Chris Evans（火人）．Michael Chiklis（石頭人）
Runtime: 106 min